„მომავალ ლიდერთა სკოლის“ (ELS) პირველი ფაზა დასრულდა: საქართველოს პოლიტიკის ინსტიტუტმა (GIP) დახურვის ცერემონია თბილისსა და ქვემო ქართლის რეგიონიდან მონაწილეებისთვის, კახეთში გამართა

25-26 ივლისს, საქართველოს პოლიტიკის ინსტიტუტმა (GIP) „მომავალ ლიდერთა სკოლის“ (ELS) 2020 წლის გამოშვების ორი ჯგუფის – თბილისისა და ქვემო ქართლის – მონაწილეები სასტუმრო „ლოპოტა სპა რეზორტში“ შეკრიბა დასკვნითი ტრენინგებისა და ELS2020-ის დახურვის ცერემონიის ჩასატარებლად. ღონისძიებამ, რომელმაც 40-ზე მეტი ბენეფიციარი შეკრიბა ერთად, ELS-ის ორი სხვადასხვა ჯგუფის წარმომადგენლებს ერთმანეთთან შეხვედრის, აზრთა გაცვლისა და მომავალში პოტენციური თანამშრომლობის შესახებ საუბრის  საშუალება მისცა. დახურვის ცერემონიამდე, თბილისის ჯგუფს ჩაუტარდა ტრენინგი თემაზე: “ნატო-საქართველოს ურთიერთობები და უსაფრთხოების გამოწვევები”, რომელსაც საქართველოს უნივერსიტეტის პროფესორი, შალვა ძებისაშვილი უძღვებოდა. ქვემო ქართლის ჯგუფისთვის კი IREX-საქართველომ უზრუნველყო მედია წიგნიერების კასკადური ტრენინგი: “ისწავლე, რომ ამოიცნო”. გარდა ამისა, GIP-ის გუნდმა ELS-ის მონაწილეებისგან შემდგარ მცირე ჯგუფებთან ინტენსიური რეფლექსიის რაუნდი გამართა, რომლის დროსაც მონაწილეებს საშუალება მიეცათ ELS-ის სხვადასხვა კომპონენტთან დაკავშირებით – იქნებოდა ეს თემატური თუ ლოჯისტიკური საკითხი – კრიტიკული უკუკავშირი გაეზიარებინათ და ესაუბრათ იმაზე, თუ რა მოეწონათ და რას შეცვლიდნენ უკეთესობისკენ და როგორ.

კახეთში, ELS-ის დახურვის ღონისძიება თბილისისა და ქვემო ქართლის რეგიონიდან მონაწილეებისთვის სერტიფიკატების გადაცემის ცერემონიით დასრულდა. სერტიფიკატები მონაწილეებს საქართველოს პოლიტიკის ინსტიტუტის (GIP) დირექტორმა, კორნელი კაკაჩიამ გადასცა. 

მომვალ ლიდერთა სკოლის (ELS) პირველი ფაზა, რომელიც 6 თვეს მოიცავდა, თებერვლიდან ივლისის ჩათვლით გაგრძელდა. მასში მონაწილეობას 18-35 წლამდე ასაკის ახალგაზრდები იღებდნენ თბილისიდან, ქვემო ქართლიდან, გურიიდან, აჭარისა და სამეგრელო-ზემო სვანეთის რეგიონებიდან. 

ამ პერიოდის განმავლობაში, თითოეულ რეგიონში, რომელსაც ELS პირველი ფაზა ფარავდა, სულ 24 ტრენინგი ჩატარდა (მათ შორის ონლაინ) სხვადასხვა საინტერესო თემაზე, მაგალითად: განათლების პოლიტიკა საქართველოში (ტრენერი რევაზ აფხაზავა), რელიგია და ტოლერანტობა (ტრენერი ლევან გიგინეიშვილი), საჯარო გამოსვლა (ტრენერი ანდრო დგებუაძე), საქართველოს ეკონომიკური გამოწვევები და მათი დაძლევის გზები (ტრენერი კონსტანტინე სულამანიძე), ქალთა პოლიტიკური მონაწილეობა (ტრენერი მაკა მეშველიანი), სამოქალაქო პატრიოტიზმი, ნაციონალიზმი და ეთნო-კულტურული მრავალფეროვნება (ტრენერი გია ნოდია), სათემო პროექტების მართვა და ფონდების მოძიება (ტრენერი ხათუნა იოსელიანი) და სხვა. შესაბამისად, მონაწილეებს საშუალება ჰქონდათ ცნობიერება აემაღლებინათ სხვადასხვა აქტუალურ თემაზე, ასევე თავად დაეგეგმათ და მოეწყოთ ღია ტიპის დისკუსიები და თავიანთი ხედვები გაეზიარებინათ პოლიტიკოსებისთვის, ექსპერტებისა და გადაწყვეტილებების მიმღები პირებისთვის სხვადასხვა სფეროდან. 

მომავალ ლიდერთა სკოლის (ELS) დახურვის ცერემონია, ასევე, გაიმართება 1 აგვისტოს მესტიაში – მონაწილეებისთვის სამეგრელო-ზემო სვანეთის რეგიონიდან, ხოლო 2 აგვისტოს ქობულეთში – მონაწილეებისთვის აჭარასა და გურიიდან. 

მოუსმინეთ ELS2020-ის მონაწილეებს თბილისსა და ქვემო ქართლიდან, მათ მიერ მომავალ ლიდერთა სკოლაში მიღებული ცოდნისა და გამოცდილების შესახებ:

მომავალ ლიდერთა სკოლის (ELS) მეორე ფაზის დაწყება სექტემბერში იგეგმება და ის უკვე საქართველოს სხვა (ახალ) რეგიონებში გადაინაცვლებს. 

მომავალ ლიდერთა სკოლა არის ინიციატივა, რომელიც GIP-ის მიმდინარე პროექტის ცვლილებებზე ორიენტირებული ახალგაზრდების ხელშეწყობა საქართველოში ფარგლებში ხორციელდება USAID/Georgia-ს ფინანსური მხარდაჭერითა და კავკასიის კვლევითი რესურსების ცენტრთან (CRRC Georgia) თანამშრომლობით.

პროექტი მიზნად ისახავს ახალგაზრდების ცნობიერების ამაღლებას პოლიტიკური პროცესებისა და დემოკრატიზაციის შესახებ, მათი ლიდერული უნარ-ჩვევების განვითარებას, პოლიტიკური და სოციალური ჩართულობის წახალისებას და მათ პროფესიულ ზრდას. 

ნახეთ ფოტოგალერეა აქ >>

 

Related Posts