ახალი წიგნი „უსაფრთხოების დინამიკა შავი ზღვის რეგიონში გეოპოლიტიკური ცვლილებები და რეგიონული წესრიგი“ წარადგინეს შავი ზღვის უსაფრთხოების კონფერენციაზე თბილისში და ბრიუსელში დისკუსიაზე: „ევროკავშირი და შავი ზღვის რეგიონის უსაფრთხოება ცვალებადი გეოპოლიტიკის პირობებში.“
პროფესორმა კორნელი კაკაჩიამ, საქართველოს პოლიტიკის ინსტიტუტის დირექტორმა და წიგნის თანარედაქტორმა, განიხილა შავ ზღვაში გეოპოლიტიკური კონტექსტის ცვალებადობის მნიშვნელოვანი გამოწვევები. მან ყურადღება გაამახვილა გლობალური და რეგიონალური აქტორებისა და თავად ევროკავშირის პერსპექტივაზე.
რუსეთსა და უკრაინას შორის კონფლიქტმა ხაზი გაუსვა შავი ზღვის კონტროლისთვის მიმდინარე კონკურენციას, რომელიც გადამწყვეტია ევროპის უსაფრთხოებისთვის. 2014 წელს რუსეთის მიერ ყირიმის ანექსიის შემდეგ, რეგიონი იქცა რუსეთსა და დასავლეთს შორის გავლენისთვის ბრძოლის ველად. გარდა ამისა, შავ ზღვას აქვს მნიშვნელოვანი ეკონომიკური და სატრანზიტო პოტენციალი, რითაც ევროპას სთავაზობს კასპიისა და ცენტრალური აზიის რეგიონებიდან ენერგორესურსებზე წვდომას. ევროკავშირისთვის შავ ზღვას სასიცოცხლო მნიშვნელობა აქვს აზიასა და ახლო აღმოსავლეთთან მისი მზარდი კავშირის პოლიტიკისთვის. რუსეთის ქმედებების საპასუხოდ, ევროკავშირი შავი ზღვის რეგიონისთვის ახალ სტრატეგიულ პოლიტიკას განიხილავს. თუმცა, აუცილებელია, რომ ევროკავშირმა, ნატოსთან და აშშ-სთან ერთად, მჭიდროდ ითანამშრომლოს რეგიონის ქვეყნებთან საერთო გამოწვევების გადასაჭრელად. ევროკავშირსა და მის დასავლელ პარტნიორებს გადამწყვეტი როლი აკისრიათ რეგიონში სტაბილურობისა და უსაფრთხოების უზრუნველყოფაში, რაც არსებითად მნიშვნელოვანი იქნება ევროპის საერთო უსაფრთხოებისთვის.
ბრიუსელსა და თბილისში გამართული ღონისძიებები ფოკუსირებული იყო შავი ზღვის რეგიონისა და სამხრეთ კავკასიის პოლიტიკურ და უსაფრთხოების გარემოზე. წიგნის პრეზენტაცია მიზნად ისახავდა შავი ზღვის რეგიონის მნიშვნელობის ხაზგასმას უფრო ფართო ევროპული უსაფრთხოების ჭრილში. ღონისძიებაზე შეიკრიბნენ ექსპერტები, პოლიტიკოსები და დიპლომატიური მისიების წარმომადგენლები, რათა განეხილათ შავი ზღვის რეგიონის მნიშვნელობა ევროპის უსაფრთხოების არქიტექტურისა და საერთო მომავლისათვის.
შავი ზღვის უსაფრთხოების კონფერენცია გაიმართა ევროპის ლიბერალური ფორუმის მიერ, ფრიდრიხ ნაუმანის ფონდი თავისუფლებისთვის და ევროპა–საქართველოს ინსტიტუტთან თანამშრომლობით, კონრად ადენაუერის ფონდის მონაწილეობით.
ბრიუსელში დისკუსია „ევროკავშირისა და შავი ზღვის რეგიონის უსაფრთხოება ცვალებადი გეოპოლიტიკის ფონზე“ მოეწყო კონრად ადენაუერის ფონდის მიერ საერთაშორისო ურთიერთობების გერმანული საბჭოსთან (DGAP) თანამშრომლობით.
