Authors
2022-09-26 12:01:08
წინამდებარე პოლიტიკის დოკუმენტი შავი ზღვის უსაფრთხოების საკითხზე ერთობლივი კვლევითი პროექტის შედეგია, რომელშიც უკრაინის, აზერბაიჯანისა და საქართველოს მკვლევრები მონაწილეობდნენ. მასში გადმოცემულია საგარეო პოლიტიკის საკითხებზე მომუშავე უკრაინელი, აზერბაიჯანელი და ქართველი ექსპერტების მოსაზრებები უკრაინაში რუსეთის შეჭრის შემდეგ შავი ზღვის რეგიონის და ფართო ევროპული უსაფრთხოების მომავლის შესახებ. ეს არის ის სამი ქვეყანა, რომელიც შავი ზღვის რეგიონის პოლიტიკური, ეკონომიკური და სატრანზიტო ეკოსისტემების მნიშვნელოვან ნაწილს ქმნის და შეუძლია ერთ-ერთი წამყვანი როლი შეასრულოს ევროპული უსაფრთხოების მომავალი წესრიგის ჩამოყალიბებაში. კვლევის შედეგები, რომლებიც ექსპერტთა ვრცელ გამოკითხვასა და ინტერვიუებს ემყარება, აჩვენებს გარკვეულ განსხვავებებს ამ სამ ქვეყანას შორის, მაგრამ, ამავე დროს, მეტი სინერგიისა და თანამშრომლობის პოტენციალს შავი ზღვის რეგიონში. საგარეო და უსაფრთხოების პოლიტიკის სფეროს უკრაინელ, აზერბაიჯანელ და ქართველ ექსპერტებს მთავარი რეგიონული რისკების, საფრთხეებისა და შესაძლებლობების მსგავსი აღქმა აქვთ და მკაფიოდ უჭერენ მხარს შავი ზღვის რეგიონში მშვიდობის და თანამშრომლობის წესრიგის დამყარებას. მეორე მხრივ, იკვეთება განსხვავებები ძირითადად მომავალი ალიანსების და საგარეო პოლიტიკის ტაქტიკებთან დაკავშირებით. მაშინ, როდესაც საგარეო პოლიტიკის სფეროს უკრაინელ და ქართველ ექსპერტებს მყარად პროდასავლური და რუსეთისადმი სკეპტიკურები დამოკიდებულება აქვთ, აზერბაიჯანელი ექსპერტები უფრო დაბალანსებული და ნაკლებად ევროცენტრულ საგარეო პოლიტიკას ემხრობიან.
საკვანძო სიტყვები: შავი ზღვა, უსაფრთხოება, უკრაინა, აზერბაიჯანი, საქართველო, ნატო, ევროკავშირი, რუსეთი
