პოლიტიკური ვენდეტის შიში თუ ხელისუფლების შენარჩუნების სურვილი: მმართველი პარტიის ანტიდასავლური რიტორიკის შესაძლო მიზეზები

უკრაინაში რუსეთის შეჭრის საპასუხოდ მობილიზებულმა დასავლურმა სოლიდარობამ ევროკავშირის აღმოსავლეთ პარტნიორებისთვის ისტორიული შესაძლებლობების ფანჯარა გააჩინა. უკრაინამ, მოლდოვამ  და საქართველომ ევროპული ინტეგრაციის დაჩქარების შანსი მიიღეს. თუმცა, მეორე მხრივ, გაჩნდა ასოცირებული ტრიოს დაშლის საფრთხეც. მაშინ, როდესაც კიევსა და კიშინიოვს ევროკომისიამ კანდიდატის სტატუსი მიანიჭა, თბილისისთვის ამ პერსპექტივამ დროში გადაიწია. ამ მოვლენების ფონზე, განსაკუთრებით ყურადსაღებია საქართველოს მმართველი პარტიის სამოქმედო სტრატეგიის პარადოქსულობა. ერთი მხრივ, პარტია თითქოს ევროატლანტიკური ინტეგრაციის ერთგული რჩება და პარლამენტის დონეზე  ევროკავშირის წევრობის კანდიდატის სტატუსის მიღებაზე მუშაობა უკვე დაწყებულია. თუმცა, მმართველი პარტიის რიტორიკა თანხვედრაში არ მოდის აღნიშნულ მიზანთან, რომლებიც ქვეყანაში დემოკრატიის უკუსვლასთან დაკავშირებით დასავლელ პარტნიორების კრიტიკას საქართველოს ომში ჩართვის მცდელობის შესახებ მწვავე ბრალდებით პასუხობენ, (Interpressnews 2022), მიუხედავად იმისა, რომ ეს არაერთხელ უარყვეს ამერიკის შეერთებული შტატებისა თუ ევროკავშირის წარმომადგენლებმა (Civil.ge 2022)[1].

ამგვარი რიტორიკა მნიშვნელოვნად აზიანებს ქვეყნის ეროვნულ ინტერესებს და საქართველოსთვის სტრატეგიულ პარტნიორებთან თანდათანობით გაუცხოების და რუსეთთან პირისპირ დარჩენის საფრთხეს შეიცავს. ამ რისკებიდან გამომდინარე, საზოგადოებაში ჩნდება კითხვები იმის შესახებ, თუ რა მიზანს ემსახურება „ქართული ოცნების“ მხრიდან აშშ-სა თუ ევროკავშირის წარმომდგენლებთან ღია დაპირისპირებაში შესვლა. მმართველი პარტიის მხარდაჭერით არჩეულმა  პრეზიდენტმა ზურაბიშვილმაც აღნიშნა, რომ „ქართული ოცნების“ რიტორიკა სულ მცირე არ იყო სასარგებლო კანდიდატის სტატუსის მოპოვების გზაზე და რომ ეს მისთვისაც ბევრ კითხვას ბადებს (Parulava 2022). მნიშვნელოვანია, რომ ქვეყანაში დემოკრატიის უკუსვლისა და გადავადებული ევროპული პერსპექტივის გათვალისწინებით, სტრატეგიული პარტნიორების მიმართ მსგავსი უპრეცედენტო მასშტაბის აგრესიული დისკურსი,   ეჭვებს აღძრავს იმასთან დაკავშირებით, თუ რამდენად ერთგულია „ქართული ოცნება“ ქართველი ხალხის მიერ ათწლეულების განმავლობაში არჩეული საგარეო პოლიტიკური კურსის მიმართ.

[1] საინტერესოა, რომ „ქართული ოცნების“ დამფუძნებელმა ბიძინა ივანიშვილმა არ უარყო მისი გუნდიდან საჯაროდ წასული დეპუტატების ანტიდასავლური ბრალდებები. ასევე, ამავე პარტიის თავმჯდომარის უარყოფითი კომენტარები დასავლეთის მიმართ 57-ს აღწევს, მაშინ, როდესაც რუსეთის როგორც აგრესორი ქვეყნის მიმართ კრიტიკული განცხადება მხოლოდ ცხრაჯერ გაკეთდა (Kincha 2022).

პოლიტიკის მემორანდუმი #58 | სექტემბერი 2022

Photo Credit: INFORMATION CENTER ON NATO AND EU